Жасанды интеллектке кіріспе

Пәннің атауы: Жасанды интеллектке кіріспе Пәнге түсіндірме: «Жасанды интеллектке кіріспе» пәні білім алушыларды жасанды интеллекттің (ЖИ) теориялық негіздерімен, негізгі ұғымдарымен, даму тарихымен және қазіргі қолдану салаларымен таныстыруға бағытталған. Пән барысында интеллект, алгоритм, деректер, модель, машиналық оқыту, нейрондық желілер, генеративті ЖИ секілді негізгі түсініктер қарастырылады. Курс жасанды интеллект жүйелерінің қалай жұмыс істейтінін, олардың адам қызметін автоматтандырудағы рөлін және білім беру, медицина, өнеркәсіп, бизнес, инклюзивті орта сияқты салаларда қолданылуын түсіндіреді. Сонымен қатар, ЖИ-дің этикалық, құқықтық және әлеуметтік мәселелері, деректер қауіпсіздігі мен жауапты қолдану қағидаттары талданады. Пән практикалық бағытта құрылып, білім алушыларға дайын ЖИ құралдарымен (чат-боттар, мәтін, сурет, тест, презентация генераторлары) жұмыс істеу дағдыларын қалыптастыруды көздейді. Бағдарламалау терең деңгейде талап етілмейді, негізгі назар ЖИ-ді саналы қолдану, дұрыс сұрақ қою (prompt engineering) және нәтижені талдау дағдыларына аударылады. Пәннің мақсаты: Білім алушыларда жасанды интеллект туралы жүйелі түсінік қалыптастыру және ЖИ құралдарын оқу-танымдық және кәсіби қызметте тиімді пайдалану қабілетін дамыту. Пәннің міндеттері: Жасанды интеллекттің негізгі ұғымдары мен түрлерін меңгерту; Машиналық оқыту мен генеративті ЖИ принциптерін түсіндіру; ЖИ құралдарын тәжірибеде қолдану дағдыларын қалыптастыру; ЖИ-дің мүмкіндіктері мен шектеулерін сыни тұрғыда бағалауға үйрету; Этика, академиялық адалдық және жауапты қолдану мәдениетін дамыту. Күтілетін нәтижелер: Пәнді аяқтаған білім алушы: жасанды интеллекттің жұмыс істеу логикасын түсінеді; ЖИ құралдарын оқу және кәсіби міндеттерде қолдана алады; дұрыс сұраныс (prompt) құрастырады; алынған нәтижені талдап, бағалай алады; ЖИ-ді қауіпсіз және этикалық тұрғыда пайдаланудың маңызын біледі.